Avqust ayının 17-si nəhayət ki, hamımızın həyəcanla gözlədiyimiz əməliyyat uğurla həyata keçdi və setyabr ayının 6-sında balamız Azərbaycana qayıtdı.
Əlimizə fürsət düşən kimi, təbii ki, getdik balamızı ziyarət etməyə. Lazımi məbləğin yığılmasında rolu olan digər qrupun üzvləri bizdən bir neçə gün əvvəl ziyarət etmişdilər və bol-bol şirniyyat, meyvə aparmışdılar, odur ki, biz Zeynəbimizə jurnallar, "özün rənglə", pazl kimi hədiyyələr apardıq. Zeynəb hələ məktəbə getməsə də, artıq oxuya və sadə hesablamalar edə bilir.
Əməliyyat məbləği 15.000 dollar idi, bundan əlavə ailənin İstanbula gediş-gəliş bileti, otel pulu.. və bu təkcə 1ik.Biz-in görə biləcəyi bir iş deyildi. Uşağın anası bizə müraciət edəndə, məbləğ bizim üçün əlçatmaz olsa da, demək olar ki, qrupun bütün üzvlərinin ürəyində "alınacaq" deyə bir inam olub. Buna səbəb isə Zeynəbin üzündəki daimi təbəssüm, müsbət enerjisi olub yəqin ki. Bir neçə xeyriyyə qrupu, dost, tanış, qohum - bu işin başa gəlməsində çox-çox sayda, adlarını belə bilmədiyimiz, üzlərini belə görmədiyimiz insanların rolu olub. Və bu qədər insanı Allahın köməkliyi ilə bu işə cəlb edən əsas insanlar Zeynəbin valideynləri olub. Əgər onların bu əzmi və inadkarlığı olmasa idi, nə bu qədər insan bu işdən xəbər tutardı, nə bu qədər yardımsevər biryerə yığılardı, nə də belə qısa müddətdə belə bir iş başa çatardı.
"Bacarmaram" deyib övladlarınızı darda qoymayın, əmin olun ki, siz övladınızı qoruyacaq mələklərsiz, dağları yerindən oynada bilərsiniz. Təbriklər, Pərviz, Leyla, Zeynəb - Paşayevlər ailəsi
İnşALlah, Zeynəb balamızın həyatdakı bütün addımları uğurlu olar, baxıb sevinərik, fərəhlənərik!
Şərhlər