Sən Də Qoşul!

Aksiyamız boyunca 20 ailədən 23 şagirdə məktəb ləvazimatları yardımı edildi...
Bu 23 şagirdin 12-si Respublikamızın bölgələrində, qalan 11-i isə paytaxtda yaşayır.
Ailələr və şagirdlər barədə məlumatların çox qismini bu şagirdlərin müəllimləri özləri çatdırdı bizə. Qohum-qonşularının verdiyi məlumatları isə, imkan daxilində müəllimlərdən dəqiqləşdirdik. Çünki şagirdlərin dərslərinə qarşı məsuliyyətli olmaları əsas şərtlərimizdən biri idi. Ki bunu da müəllimlərdən yaxşı heç kim bilə bilməzdi yəqin ki.
İlk olaraq, ibtidai sinif şagirdlərimizin ləvazimatlarını çatdırdıq. Onlardan 3-ü 3-cü sinif şagirdi, 1-i isə 2-ci sinif şagirdidir.
Daha sonra Bakıdakı şagirdlərimizin ləvazimatlarını özlərinə çatdırdıq.
Yerdə qalan 12 şagirdin 3-ü Sabirabad, 1-i Bərdə, 1-i Tərtər rayonu sakini olduğuna görə, onları avtovağzaldan sürücülərin köməkliyi ilə çatdırdıq.
Füzuli rayonundakı şagirdlərimizinsə sayı nisbətən çox (7 şagird) olduğundan, bu rayona özümüz getmək qərarına gəldik.
Və məhz bu ziyarətdən olan şəkilləri ətrafdakılarla bölüşmək qərarına gəldik.
Şagirdlər 2 müxtəlif məktəbin şagirdləri idi. Bir qismini məktəbin özündə - direktorun otağında çatdırdıq. Digər məktəbin şagirdlərilə görüşmək üçünsə ünvanlarını öyrənməli olduq.



23 şagirdimizin 3-ü bu il abiturient olacaq, İnşAllah! Allahın köməkliyi ilə tələbə adını qazansınlar, baş ucalığımıza çevrilsinlər, sevinək!
Ləvazimatlarımız topdan alındığına görə, bəzilərindən əlavə qalanlar da oldu, onlardan münasib olanları da yığıb, hələ bu il məktəbli olacaq bir oğlan balamızı sevindirmək qərarına gəldik. Bu uşaq siyahida yox idi (bu uşağı da nəzərə alsaq, şagirdlərimizin sayı 24-dür). İnşAllah, məsuliyyətli şagird olar, baxıb fərəhlənərik!

Dərs ilinin başlanmasına çox az qalmasına baxmayaraq, hələ də müraciəti qəbul olunan şagirdlər var. Onlar barədə məlumat araşdırılıb dəqiqləşdirildikdən sonra onlara da əl tutmağa çalışacağıq. Bu haqda əlavə məlumat veriləcək.

Aksiya boyunca müəllimlərdən xüsusi dəstək gördük. Hətta bu ilin 11-ci sinif şagirdləri üçün təmənnasız hazırlıqların keçirilməsinə həvəsli müəllimlərimiz də oldu. Odur ki, gələcəkdə "Mən də oxumaq istəyirəm!" aksiyasının genişləndirilməsi nəzərdə tutulur.

Onu da qeyd edək ki, aksiyamız üçün lazım olan bütün kitab vəsaitləri keçmiş məktəblilərdən toplanmışdır.
Dəftər, qələm və s. kimi 21 adda digər ləvazimatlar isə topdan şəkildə bazadan alınmışdır.
Bəzilərini məktəblilərə əl uzatmaq həvəskarı olan vətəndaşlarımız şəxsən alıb gətirmişdilər...

Aksiya boyunca gözləmədiyimiz yerlərdən, gözləmədiyimiz sayda, gözləmədiyimiz qədər dəstək gördük.. Maddi, mənəvi, əməli şəkildə zərrə qədər də olsa dəstəyi olan hər bir kəsə böyük hörmətlər, sevgilər, dualar... Hər birinə ayrılıqda təşəkkür etsək, bəlkə yüzlərlə insana təşəkkür etməli olarıq. Allah bu insanların hər birinə özü kömək olsun, heç birini darda qoymasın İnşAllah!

Aksiyalarımızın davamlı, əməkdaşlarımızın daimi, vətəndaşlarımızın bütün işlərdə ətrafdakılara qarşı diqqətli və mərhəmətli olmaları diləyilə...1ik.Biz...